Молитва к пророку моисею

Новая статья: молитва к пророку моисею на сайте святая-молитва.рф - во всех подробностях и деталях из множества источников, что удалось нам найти.

Молитва к пророку моисею

Избранный Богом на служение пророческое, подвигами твоими Творца и Господа прославивый, промысел благий о спасении рода человеческаго явлей, просиявый пламенною ревностию по Бозе Вседержителе, святостию жития и чудесы, похвальная восписуем ти, пророче Божий Моисее. Ты же, яко имея дерзновение велие у Святыя Троицы, предстательством твоим небесным помогай нам, да зовем ти :

Радуйся, честный и славный пророче, Боговидче Моисее!

Архангелов и ангелов Царь и всея твари Зиждитель, времена и лета в деснице своей положивый и судьбы народов и царств устраяяй, егда восхоте извести народ израильский из страны рабства,от корени праведнаго произрасти тя, богоносный Моисее, благодатию Своею озари и посла тя в землю Египетскую, да совершиши исход великий во страну Обетованную и образ спасения нашего сим явиши. Темже благодаряще Творца нашего, славословим и тя, великаго пророка Божия, да зовем ти:

Радуйся, избранниче Божий, делу спасения нашего послуживый!

Радуйся, яко не бе у Израиля более пророка, тебе равнаго! [Втор. 34: 10-11]

Радуйся, высокий посредниче закона богодарованнаго!

Радуйся, грядущее воплощение Сына Божия проповедевый!

Радуйся, прообраз Христа – Спасителя в житии и трудех твоих явлей!

Радуйся, венцем победным паче звезд на небеси блистаяй!

Радуйся, в неизреченной славе Творца мира ныне созерцаяй!

Радуйся, со всеми ангелы и святыми хвалу Ему воспеваяй!

Радуйся, честный славный Пророче, Боговидче Моисее!

Кондак 2 Видеста благочестивыя родителя твоя, святый пророче, слуг фараоновых, младенцев израильских избивающих, потщастася сохранити тя до времене и Господем вдохновляема положиста тя в кошницу и в воды реки Нила ввергоста и сим живот твой в руце Вседержителя предавающа, воспеста Ему: Аллилуия!

Кондак 2 ( вариант 2)

Видеста благочестивыя родителя твоя, прехвальный Моисее, слуг фараоновых, младенцев израильских избивающих, потщастася сохранити тя до времене и Господем вдохновляема положиста тя в кошницу и в воды реци Нила ввергоста и сим живот твой в руце Вседержителя предаста. Мы же , сия ныне вспоминающе, просим тя, святый пророче, всеблагощным предстательством твоим сохрани нас среди волн мирских соблазнов и настави достойно и праведно воспевати Богу: Аллилуия!

Разумом свыше просвещена бысть дщи фараона Египетскаго, егда узревши тя по реце Нилу в кошнице плывуща, взяла есть тя в чертоги своя и, аки сына, воспита. Ты же, всеславный Моисее, веру и обычаи народа своего сохраняя, возрастал еси в трезвении и богомыслии, любовь всяческую к соплеменником своим являя. Мы же вся сия воспевающе, Господа хвалим и поем ти сице:

Радуйся, Промыслом Божиим в летах младенчества твоего от смерти исхищенный!

Радуйся, из воды извлеченный и сего ради Моисеем нареченный!

Радуйся, от мудрыя дщере фараони милости приимый!

Радуйся, материю твоею вскормленный и взращенный!

Радуйся, вере Авраама, Исаака и Иакова ею наученный!

Радуйся, измлада Бога отцев твоих всею душею возлюбивый!

Радуйся, истиною Божиею с лет юных просвещенный!

Радуйся, от утра жизни твоея (пелен младнческих) для служения пророческаго Господем приуготовленный!

Радуйся, честный и славный пророче, Боговидче Моисее!

Силою и благодатию Духа Святаго возрастал еси в вере, богомудрый Моисее, и верою велик быв, отвержися нарицатися сын дщери фараони: паче же изволи страдати с людьми Божии, неже имети временную греха сладость, болшее богатств египетских вменил еси себе верность Вседержителеви, памятуя о мздовоздаянии. [Евр 11:24-26] Сего ради Господь понуди тя, избранника Своего, покинути землю египетскую и в пределы Мадиамския на многая лета вселитися. Ты же на милосердное промышление Всеблагаго Творца Нашего выну уповая, неустанно взывал еси Ему : Аллилуия!

Имея велие благоволение к тебе, о преславный Моисее, видения пречуднаго тя сподоби Господь, егда узрел еси в пустыни купину неопально горящую и услышал еси глас Божий, откровение Творца Нашего (о сущности Своей) возвещаяй ти и итти ти в землю Египетскую повелеваяй, дабы вывести народ избранный в страну обетованную. Сего же ради дарова ти Господь силу чудеса и знамения творити и со дне того почи на тя велия благодать Божия. Мы же веру твою ко Господу и надежду на велию милость Его воспевающе, глаголем ти сице:

Радуйся, Предвечному и Присносущному Богу поклонивыйся!

Радуйся, в живое общение с Господем вступивый!

Радуйся, вещания Божии «уста ко устом» принимавый! (Числ. 12;8 )!

Радуйся, мир Божий наитием Духа Святого получивый!

Радуйся, светом Божественным умы и сердца наша озаряяй!

Радуйся, всех нас к подвигам благочестия ныне призываяй!

Радуйся, от заблуждений духовных нас благодатно исцеляяй!

Радуйся, от путей погибельных нас преславно удаляяй!

Радуйся, честный и славный Пророче, Боговидче Моисее!

Бури помышлений сумнительных бежавше, досточудный Моисее, повеление Божие исполнити желая, потекл еси в землю Египетскую, и на пути сем сретал еси брата твоего Аарона, иже от дни того бе помощник и соратник твой, помагаяй ти в велицем служении твоем. Мы же, вся сия ныне поминюще, просим тя, всехвальный пророче, утверди и нас в вере и верности, яже к Богу, да уповая на всемогущество и милость укрепляющего ны Господа нашего, непрестанно вопием Ему: Аллилуия!

Слышав Мернемтах царь Египетский повеление Божие, о еже отпустити народ израильский в пустыню для принесения жертвы Богови, разъярися зело и повеле предати израильтян работе горцей. Ты же, о святый Моисее, умолял еси Создателя нашего (о еже согрети сердце фараоново и) чудо исхода совершити; веруя, яко не оставит Господь тя и народ твой. Мы же, благоговейно святую память твою чтуще, таковые похвалы тебе приносим:

Радуйся, великий посланиче Царя Небеснаго и провозвестниче повелений Его!

Радуйся, скорбящему народу израильскому милость Божию принесший !

Радуйся, волны сомнений о камень веры разбиваяй!

Радуйся, горняя, а не земная, мудроствовати нас научаяй!

Радуйся, пламень молитвы в нас возжигаяй!

Радуйся, приходящих к тебе от рабства диаволу свобождаяй!

Радуйся, утешение и вспоможение всем верным являяй!

Радуйся, честный и славный Пророче, Боговидче Моисее!

Боготечней звезде уподобился еси, о святый пророче, егда свершишася казни египетския и настало есть время покинути народу израильскому страну рабства. Тогда же во знамение и память исхода великаго повелел еси заклати агнцев и кровию агнчею покрыти двери жилищ израильских, знаменующе сим грядущия искупительныя страдания Сына Божия. Мы же, зряще ныне преславное прообразов сбытие, в радости духовней Господеви поим: Аллилуия!

Видя воинство фараоново народ твой настигающее, возвел еси, богомудрый Моисее, руце твои горe и усердно молил еси Вседержителя чудо свершити и, егда простерл еси жезл твой на море, разтупишася воды сюду и сюду и проидоша сынове израилеви среди моря, яко по суше, воды же им быша одесную и ошую, египтяне же потонуша. Мы вся сия слышаше, зовем ти тако:

Радуйся, яко по молитве твоей яви Господь чудо преславное!

Радуйся, естество водное послушным быти тебе сотворивый!

Радуйся, знаменьми и чудесы Божественную истину утвердивый!

Радуйся, переходом чрез море прообраз святаго крещения явивый!

Радуйся, велие славословие Всемогущему Господу воздавый!

Радуйся, из глубины греховней к высоте духовней возводяяй!

Радуйся, праведный гнев Божий молитвами Твоими умягчаяй!

Радуйся, честный и славный Пророче, Боговидче Моисее!

Проповедника добрых дел явил еси себе, богоблаженне пророче, ты бо ревнуя о чистоте веры, потщался еси труды многими лукавые нравы и обычаи нечестивых сынов израилевых исправити, боговедению бо и благочестию научал еси паству твою присно, наставляя ни одесную, ни ощую уклонятися (Втор. 28: 14) от пути царственнаго (Числ. 20: 17) добродетелей богоугодных, паче же образом жития своего наставляя на путь спасения, да выну вопиют вси Вседержителю Богу: Аллилуйя!

Кондак 6 ( вариант 2)

Проповедника добрых дел явил еси себе, богоблаженне пророче , ты бо ревнуя о чистоте веры , потщался еси труды многими лукавые нравы и обычаи нечестивых сынов израилевых исправити, боговедению бо и благочестию научал еси паству твою присно, наставляя ни одесную, ни ощую уклонятися (Втор. 28: 14) от пути царственнаго (Числ. 20: 17) добродетелей богоугодных, паче же образом жития своего наставляя на путь спасения. Мы же ныне молим тя, святый Моисее, предстательством твоим небесным испроси и нам сия боголюбезныя добродетели, да не поработимся страстем греховним, но благочестно воспоем Спасителю Нашему: Аллилуйя!

Возсияла есть на тебе слава и благодать Господня, о прехвальный Моисее, егда стоящу тебе на горе Фейранстей и к Небу руце твои в молитве крестообразно воздвигающу, предстательства твоего ради дарова Господь победу сыновам израилевым и амаликову силу победил еси. Мы же, воспевающе чудеса Божия, явленная тобою и на твое предстательство уповающе, глаголим ти сице:

Радуйся, прежде страданий Сына Божия благодатную силу Креста Господня явлей!

Радуйся, яко и Господь во всем послуша тя и по прошению твоему вся твори!

Радуйся, яко ударом жезла о скалу воду жаждущему народу источил еси!

Радуйся, яко сим прообраз Христа, живот вечный источающаго, показал еси!

Радуйся, источниче Божий, жажду духовную многих утоливый!

Радуйся, неверующих в Промысел Божий в вере утверждаяй!

Радуйся, немощных духом силою благодати Божией исполняяй!

Радуйся, изнемогающих от уныния и скорбей, всеоружием надежды облекаяй!

Радуйся, честный и славный Пророче, Боговидче Моисее!

Хотяй всем человеком спастися и в разум истины приити Всеблагий и Многомилостивый Создатель наш даровал чрез тебе, святый Моисее, скрижали Завета Своего народу твоему, а такожде на вся времена до скончания века сего заповедьми своими просветил есть вся люди Творца истинно чтущия и нелицемерно вопиющия Ему: Аллилуия!

Новыя и преславныя повеления Божия со тщанием и любовию исполнял еси, о преблаженный пророче, гласу Божию внимая, скинию, идеже быста жертвенник и ковчег завета, создал еси, и такожде служение первосвященическое, священническое (иерейское; Сир. 45:8) и левитское устроил еси во Славу Божию. Тем же прозревающе будущее, яко настоящее, о пришествии в мир Спасителя возвестил еси. Мы же, вся сия ныне поминающе, (благодарственно) вопием ти сице:

Радуйся, о Славе Божии непрестанно ревновавый!

Радуйся, Ковчег Завета образы херувимов украсивый!

Радуйся, сим твердое основание иконопочитанию положивый!

Радуйся, о безсеменном рождении Сына Божия от Неискусобрачныя возвестивый!

Радуйся, десятию заповедьми во веки вся народы духовно обогощаяй!

Радуйся, заповеди сия неленностно исполняти нас наставляяй!

Радуйся, Господеви, а не человеком угождати нас научаяй;

Радуйся, от искушений и соблазнов преславно нас избавляяй !

Радуйся, честный и славный Пророче, Боговидче Моисее !

Странно бе ти, всеславный пророче, сошедши с горы , идеже сам Господь возвеща ти волю Свою, видети (брата твоего Аарона) и народ вокруг тельца златаго пения и пляски богомерзкия совершающих / аго; ты же милости ради к согрешившим соплеменником твоим умолял еси Всемогущего Бога простити и помиловати их. Мы же сия поминающе, молим тя: от пристрастия к земным богатствам нас исцели и сокровища нетленныя искати научи ны, (бедным отраду и вспоможение даруй и богатых к милосердию и благотворению подвигни), да поим просвещающему нас и тобою благодеющему нам Господу нашему : Аллилуйя!

Весь светом небесным серафимския любве пламенел еси ко Господу, преславный пророче, сего же ради Творец и Бог дивныя и чудныя знамения славы яви чрез тя, но паче всего дивно бысть ве-лие чудо Божие, егда ты, святый Моисее, на горе Синайстей узрел еси Предвечнаго Господа нашего во славе Своея пред тобою прошедшего (и тонкий глас Божественный сподобился еси во мраце и вихре слышати) и, аки слуга (служитель) верный, потекл еси во след Владыки твоего. Мы же велие дезновение и любовь твою ко Господу и велию милость Его к тебе воспевающе, в смирении сердец наших глаголем ти таковая:

Радуйся, во всем житии твоем от света к свету возходивый!

Радуйся, благоволение пред лицем Вседержителя стяжавый!

Радуйся, самовидче неизреченнаго Господнего явления !

Радуйся, созерцателю лучезарнаго Божественнаго видения!

Радуйся, причастниче огнезрачнаго трисолнечнаго сияния!

Радуйся, в смертнем телеси, безсмертия зарею просвещенный!

Радуйся, любити Бога и волю Его творити нас научаяй!

Радуйся, миром и кротостию души наши наполняяй!

Радуйся, честный и славный Пророче, Боговидче Моисее!

Всякия похвалы достойни суть житие и труды твоя, богоносне Моисее, яко странствие сороколетнее с народом твоим в пустынях Синайских прошел еси, честный пророче, терпя скорбь велию не точию от неблагодарных и злонравных соплеменников твоих, но от сродник и ближних твоих, не преставая молити Творца и Бога нашего помиловати паству твою и спасение вечное ей даровати. Мы же вся сия воспевающе, поем Господеви: Аллилуия!

Ветии многовещаннии не возмогут по достоянию воспети подвиги и труды твоя, (« возлюбленный Богом и человеки», благословенный в памяти народов (Сир. 45: 1) ), святый и всехвальный пророче Моисее, яже ты подъял еси славы Божия ради: Божественною истиною народ израильский просветил еси и вывел его из рабства египетскаго, Священное Писание оставил нам еси, им же и мы ныне просвещаеми, благодарим тя за велия труды твоя и приносим ти похвалы сия:

Радуйся, самовидче величия Божия, паче царей и славных земли от Господа на веки препрославленный (Сир. 45: 3)!

Радуйся, сокровище премудрости чадом Божиим явлей!

Радуйся, им же народ Божий ( род христианский) умудривый!

Радуйся, яко тобою ум наш в Богомыслии поучается!

Радуйся, яко тобою мрак неведения преславно прогоняется!

Радуйся, яко тобою истина Христова присно утверждается!

Радуйся, от востока и запада хвалимый и превозносимый!

Радуйся, от всех концов земли величаемый и прославляемый!

Радуйся, честный и славный Пророче, Боговидче Моисее !

Спасительного подвига твоего зряще течение, радуемся и веселимся о тебе, пророче святый, яко в старости добрей свято и праведно жизнь земную о Господе скончал еси. Ты бо на землю обетованную с горы Нево взирая, предал еси дух твой в руце Божии.Сего ради (святое (блаженное) успение твое славяще,) молим тя, да егда и мы сном смертным усыпати начнем, умоли Господа кротко душу нашу от тела отделити и бесовския власти ю избавити, спасения вечнаго нас удостоити, да зовем Господеви в радости святых: Аллилуйя!

Стеною молитв твоих небесных, святый пророче Божий, защити нас от враг видимых и невидимых, помози нам во скорбех и нуждах наших и предстательством твоим благомощным избави нас от лютых бед и напастей бесовских, утверди сердца наша по Бозе горети и нелицемерно ближних наших любити нас научи. Мы же твое предстательство воспевающе, глаголем ти сице:

Радуйся, верный служителю и ближний друже Господень!

Радуйся, путей покаяния и спасения мудрый сказателю!

Радуйся, кротких и благих нравов благоискусный насадителю!

Радуйся, нечестивых и душетленных обычаев неуклонный искоренителю!

Радуйся, от похотей плотских и страстей нас отвращаяй!

Радуйся, дух милосердия в сердцах наших воскресаяй!

Радуйся, имя твое призывющим отраду ( радость) велию подаваяй !

Радуйся, за вся Творца благодарити нас наставляяй!

Радуйся, честный и славный пророче, Боговидче Моисее!

Пение непрестанное Творцу и Богу нашему паче иных пророк древних принесл еси, всеславный Моисее, и велие дерзновение обрел еси пред престолом Всесвятыя Троицы; тем же ныне молим тя, о превеликий угодниче Божий, изведи нас из рабства греховнаго в свободу чад Божиих, просвети сердце наше и ум наш очисти, да сподобимся купно с тобою воспевати Богу: Аллилуия!

Свет нетварный и сияние Божественное сподобился еси видети, богоблаженный пророче, егда предста купно с Илиею и поклонися, аки слуга благоговейный, Преобразившемуся на горе Фаворе Господу нашему Иисусу Христу и глаголал еси Ему исход Его, иже скончати во Иерусалиме, [Лк 9:31] ;о Божественней природе Спасителя нашего свидетельствовал еси и учеников Господа нашего в сем уверил еси. Тем же ныне молим тя, святче Божий, светом фаворским озари души наша и приими от нас величания сия:

Радуйся, об Искупительных страданиях Сына Божия вещавый!

Радуйся, яко чрез муки своя войдет Иисус во славу Свою предуказавый!

Радуйся, о безсмертии и всеобщем воскрешении из мертвых проповедавый!

Радуйся, сим истину (правду) учений пророческих о Мессии свидетельствуяй!

Радуйся, во истинней любве ко Христу всех нас утверждаяй!

Радуйся, от лености и нерадения о деле Божием нас отвращаяй!

Радуйся, Правды Божией во всем мире утверждение!

Радуйся, (всех) истины взыскующих богославное озарение!

Радуйся, честный и славный пророче, Боговидче Моисее!

Благодать и милость от Господа испроси нам, пророче Господень, се бо верою и любовию к тебе подвизаемы (пред образом святым твоим предстояще) ублажаем тя, заступника и покровителя нашего, и усердно молим тя: вознеси молитву твою ко Творцу и Богу Нашему и не престай умоляти Его благосердие, и испроси нам дар коемуждо потребен, да зовем всех благих виновнику и подателю Богу: Аллилуия!

Кондак 12 ( вариант 2)

Благодать, данную ти от Бога ведуще, всечестную память твою все радостно празднуем, пророче святый Моисее, и, со умилением сердечным притекающе ко святому образу твоему, смиренно просим: сохрани предстательтвом твоим пред Христом Господем нашим Церковь Его Святую Православную от всякаго озлобления, врагов видимых и невидимых, огради заступлением твоим от всякия козни страну нашу Российскую, да тихое и безмолвное житие провождающе, вопием Богу: Аллилуйя.

Поюще пение похвальное усты недостойными, уповаем на милость Божию и твое, пророче Божий Моисее, заступление и ходатайство за нас грешных, молим тя: не престани молитися о всех нас купно со сродники святыми твоими, супружницею твоею Сепфорою, братом твоим Аароном и сестрою твоею Мариам, да помилует нас Господь вашего ходатайства ради. О сем воздыхающе, пение похвальное тебе, угодниче Божий, приносим:

Радуйся, фимиам молитв за нас ко Святей Троице приносяй!

Радуйся, милосердие Бога-Отца к нам приклоняяй!

Радуйся, о спасении нашем Спасителя умоляяй!

Радуйся, плоды (дары) Духа Святаго стяжати нам помогаяй!

Радуйся, свято и праведно Богородицу почитати научаяй!

Радуйся, многоразличныя болезни пречудно исцеляяй!

Радуйся, всех нас в час смертный добропобедно укрепляяй!

Радуйся, чтущих память твою от всяких зол охраняяй !

Радуйся, честный и славный пророче, Боговидче Моисее!

О предивный и преславный пророче Божий Моисее, приими малое сие моление наше, от любве душевныя тебе приносимое и умоли Господа Бога (Иисуса Христа) нашего «человеколюбиваго и милосерднаго, долготерпеливаго и многомимилостиваго» (Исх.34:6) избавитися нам всех зол и напасти, да благочестне в веце сем поживем и блаженство вечное молитвами твоими обрящем, с тобою же благодарственно воспевающе Господеви: Аллилуия!

Автор сего акафиста Евгений Владимирович Храповицкий

Канон святому Пророку Моисею

Русская вера, 2017

Какое счастье для христианина иметь через молитву духовную близость со святым пророком Боговидцем Моисеем! Никто из людей не удостоился видеть в таком величии и славе Господа Бога, как это было доступно св. пророку Моисею. Находясь в обителях Небесного Царствия, этот величайший угодник Божий зрит неизреченную Славу Всевышнего, перед которой очень жалкими выглядят все земные скорби, страдания, суета.

Будем усердны к молитвенному прославлению св. пророка Моисея, и через эти наши духовные труды Господь изольет на нас Свои обильные небесные благословения. Будем просить св. Боговидца Моисея, чтобы он умолил Всевышнего о прощении наших согрешений и чтобы нам не лишиться в потустороннем мире зреть славу Лица Господня, ибо такое наказание для души гораздо страшнее, чем даже неугасимый адский огонь.

Память св. пророку Моисею 4 сентября (17 сентября по гражданскому стилю).

Порядок чтения по уставу

П ророка Твоего Господи, Моисея память празднующе, того ради молим Тя, спаси душа наша. (Дважды).

Слава, и ныне. Богородичен. В ся паче смысла, вся преславная Твоя Богородице таиньства, чистотою запечатленна, и девьством хранима, Мати разумеся неложна, Бога рождьши истиннаго, Того моли спастися душам нашим.

КАНОН, глас 4-й

М оря Чермнаго пучину, немокрыми стопами древле шествовав Израиль, крестообразно Моисеовыма рукама, Амаликову силу в пустыни победил есть.

Запев: С вятыи пророче Моисее, моли Бога о нас (поклон) .

М оисей в пророцех, да восхвалится первее, яко пред Богом беседовав первее яве, лицем к лицу. Не в гаданиих речении, но яко в зерцале плоти видев Того.

Запев. Я ко божествена собору вожда, и избавителя тя роду твоему Израилю, Моисее боговидче даст Бог, Отцеви яко же помолися, провозвещающу твое рождение.

Слава. П ремудрости тя сокровище обретоша, сродныя добродетели, сокровено разумом Божиим, яко же в ковчезе боговидче Моисее. Тем тя воспитал царево, и божественое промышление.

И ныне. Богородичен. У жасеся Моисей, видев преславное первое видение, купине и пламеню страшно смешение.

Б ога от Девы Матере, прообразуя нетленна. Его же минув времена, виде плотию.

Катавасия: И збави от бед рабы своя, святыи пророче Моисее, яко вси по Бозе к тебе прибегаем, ты бо молиши о нас Христа Бога нашего (поклон) . Господи помилуй (трижды с поклонами) .

Л ук сильных изнеможе, а немощнии препоясашася силою. Сего ради возвеселися о Господе сердце мое.

Запев. В сего не изреченнаго разума, исполнена боговидче, Дух Святыи ангелом древним научи тя разуму ясно.

Запев. Н ося издалеча божественыя зари, богознаменьми удивил еси Египта. Претворяя составом преславное естества премудре.

Слава. З арею красныя доброты твоея, иже от божественыя зари светлое сияние, и к божественей несытно вся привлече, от промышления зари.

И ныне. Богородичен. В зятся страшным видением, ко ужасному смотрению премудре. Но возгласи глас Господень, рожденнаго от Девы плотию. Катавасия.

Седален, глас 4-й. П ророк всех тя перваго яко суща, благочестно ведуще, восхваляем вернии. Первее бо Бога видел еси, яко же мощно бяше человеку видети.

Слава, и ныне. Богородичен. П речистеи руце Свои, Дево Мати простерши, покрыи уповающия на Тя, и Сыну Твоему зовущия, всем подаждь Христе милости Твоя.

В оздвижена Тя видевши церкви, на кресте солнца праведнаго, ста в чину своем, достойно взывающи, слава силе Твоей Господи.

Запев. Г угнанию языка и гласа твоего, уяснившуся божественым промышлением боговидче, вития тайнам Божиим явился еси глаголы. И ранами уязвил еси Египта.

Запев. К оль преславно звание твое о боговидче. Коль страшна дела твоих чюдес. Явибося сыи тебе Бог, и славою вознес тя, Израилеви Спасителя посла.

Слава. В сяк первенец побил еси египетскии, яко же Христос бесом умертви державу. Образ бо будущему, яже с тобою действуемая, истинным вещем быша.

И ныне. Богородичен. Н е приближайся семо, Моисей услышав, Божию гласу возопившу, ис пламене купины. Свято бо место в лепоту пронаписа плотию родитися Христу Богу. Катавасия.

Т ы Господи ми свет, в мир пришел еси, в свет святых обращая, из мрачна не видения, верою воспевающия Тя.

Запев. У даряеши Чермное, и твориши разделения многая, жезлом своим о боговидче. Да покажеши сим креста, божественую силу.

Запев. О дерзновение любезно, о простоты души чисты. Аще позна мя паче всех, к Богу боговидец рече, разумно явимися.

Слава. К аменем покрывся, не виде Божия лица яко же утаена о боговидче. Воплощение же познал еси слова яко задняя.

И ныне. Богородичен. В шел еси чювствене во мрак, и навыкл еси неизреченная о боговидче, яко хощет Девая Бога плотию родити на земли. Катавасия.

П ожру Ти со гласом хваления Господи, церкви вопиет Ти. От бесовския крове очищьшися нас ради от ребр истекшею Ти кровию.

Запев. В оиньство стяжав Божие Израиль силно, седмь злобе хананейския языки, погубил еси. Людем твоим в наследие дав землю их.

Запев. Н еизглаголанно вшед во мрак божественыи Моисей, идеже Бог бяше зовыи тя. Писанныя скрижали перстом его законныя, приял еси яко велик угодник Его.

Слава. С та послушати Бог гласа боговидца Моисея, пред лицем людии яве. Да покажет страшное со славою своею, таиньство Его.

И ныне. Богородичен. М анием божественым Тя, преднаписует Моисей славныи ковчег Богородице. Зарями Духа всюду, яко златом покровен в славу Божию. Катавасия.

Слава, и ныне. Кондак, глас 2-й. Л ик пророческии, с Моисеом и Аароном веселием днесь веселится, яко конец пророчествия их на нас исполнися. Днесь сияет крест, им же нас спасл еси. Тех молитвами Христе Боже помилуй нас.

Икос. П ророчествия благодатию обогащься, будущих разуму боголепно научился еси Духом, Моисее, богодухновенне. И предглаголеши всем Христово пришествие, и языком пребогате божественое призвание. Тем же честную твою память празднуем. И любовию поем тя, и верно ублажаем, взывающе ти славне, моли Христа Бога непрестанно о всех нас.

В пещи авраамския си дети персидьстей, любовию благоверия паче, нежели пламенем опаляеми взываху, благословен еси в церкви славы Твоея Господи.

Запев. В боговидениих неизглаголанных, божественыи писатель быв, всемудростныи вид ты и сени словом ухитрив посреде древодели, Веселеила содела боговидче Моисее.

Запев. С вященьствовати дерзнув Коррей с тобою, явися низшед во ад жив. Все цело Богу тебе, честное Моисее хранящу, царствия и священьства вкупе.

Слава. В оеводствующу тебе июдейскому языку древле Моисее явися Михаил князь Небесныи, и тела твоего божественыи хранитель. Злоначалника бо в преки глаголюща сице посрами.

И ныне. Б огородичен. Ааронов тя божественыи жезл прозябну ти показа, всем Богородице разрешение грехом. Очищение бо земленым бысть. Яко же пороптавшим на Бога, оно страшное прещение. Катавасия.

Р уце распростер Даниил, лвова зияния в рове затче. Огненую же силу угасиша, добродетелию поясавшеся, иже благочестия любители отроцы взывающе, благословите вся дела Господни Господа.

Запев. У годник воистину Божии, яко кроток услышан еси, и делы был еси. Тем познан бысть тебе Господь, паче всех пророк Моисее, и вселься в тя верно пети научи. Благословите вся дела Господни Господа.

Запев. Я ко таинник Божии, и служитель и царь Израилев, Моисее боговидче явлься. Христа проповедал еси приити плотию, прописав Его в себе страшное и божественое пришествие. Его же и образ одушевлен явился еси яве, и пророк верен.

Слава. С лова пророчествием люди, и закона повеленьми, наставил еси верно. Знаменьми и чюдесы направив, и чюдес показании. От Бога бо прозван быв боговидец Моисее, приложился еси ко отцем своим со славою многою.

И ныне. Богородичен. Н икто же пред услыша прежде тебе боговидче славне, Моисее угодниче Христов. Зане вся изрекл еси, Девыя смотрения прописующия тоя божественое рожество. В пламени бо купины видел еси зрак невидим. Катавасия.

К амень нерукосечныя горы, от несекомыя Тя Девицы, краеголныи отсечеся Христос, иже совокупи разстоящаяся естества. Тем веселящеся, Тя Богородице величаем.

Запев с поклоном. Б ыл еси боговидче самовидец Господень, и по смерти неводным течением яко в камене первее, но в человечестей плоти Христа видев, облистающа божеством.

Запев. Г ора Фаворская прославися, паче Синайския богатно, идеже Моисей от мертвых, и фезвитянин от стран живущих, Христа со апостолы зряху, преобразуема яко воистину Бога.

Слава. С паси мя милостивною си мольбою, и молитв дерзновением, яко же Израиля от бед Моисее боговидче, и лютых и нужных, християном исполнение, от всякого вреда яко поющих тя.

И ныне. Богородичен. Р учку Тя злату и скрижаль, и божественую трапезу Дево, первее Моисей написав, яве показоваше Бога родитися из Тебе. Его же видевше плотию, верно песнь скончеваем Ти. Катавасия.

Отпуст: Г осподи Исусе Христе, Сыне Божии, молитв ради пречистыя Твоея Матере, и святаго пророка Моисея боговидца, и всех ради святых, помилуй и спаси нас, яко Благ и Человеколюбец. А минь. Г осподи помилуй (трижды) . Исходные поклоны.

Статьи
Спецпроекты
«Русская вера»

При перепечатке материалов ссылка на сайт обязательна!

Оценка 4.7 проголосовавших: 18
ПОДЕЛИТЬСЯ

ОСТАВЬТЕ ОТВЕТ

Please enter your comment!
Please enter your name here